गणपतीचा सण हा महाराष्ट्रातील आणि देशभरातील नागरिकांसाठी पर्वणीचा ठरतो. या काळात रेल्वेने आपल्या इच्छित स्थळी प्रवास करणाऱ्यांची संख्या मोठी असते. सध्या कोकणवासीयांना गणेशोत्सवाचे वेध लागले आहेत. दरवर्षी लाखो चाकरमानी मुंबईमधून कोकणात आपला गणपती उत्सव साजरा करण्यासाठी जातात. गणपती जवळ आले कि तिकीट बुकिंगच्या वेबसाईट वर लोकांची अक्षरशः झुंबड उडालेली पाहायला मिळते. तिकीट बुकिंगच्यावेळी काही गोष्टींची माहिती असली तर आपल्याला आपल्या नियोजित वेळी योग्य तिकीटासह प्रवास करणे शक्य होते. या काही महत्वाच्या बाबी जाणून घेऊ…
तिकिट आरक्षणाविषयी काही महत्वाचे नियम
बऱ्याचवेळा ट्रेनचे आरक्षण फुल्ल होते, किंवा आपले तिकीट वेटिंग लिस्टमध्ये असते. अशा परिस्थितीत आपल्याला रेल्वेच्या तिकीट बुकिंगच्या नियमावलीबद्दल माहिती असेल तर आपल्याला येणाऱ्या त्रुटी आपण टाळू शकतो. तिकीट बुकिंगच्या वेबसाइटवर आपल्या नियोजित प्रवासावेळेच्या 120 दिवस आधी म्हणजेच 4 महिने आधी तिकीट आरक्षणाची व्यवस्था आहे. त्यानुसार आपण आपली ट्रिप ची आखणी करू शकतो. IRCTC च्या नियमानुसार आपल्या रेल्वेच्या अकाऊंटवरून केवळ 6 जणांचीच तिकीट बुक होऊ शकते. ट्रेन सुटण्याच्या 4 तास आधी तुम्ही तुमची तिकीट कॅन्सल करू शकता. या परिस्थितीमध्ये आपण मेल करून रिफंड मिळवू शकतो.
रेल्वेच हे नियम पाळा, बिनधास्त व्हा!
रेल्वेच्या तिकिटांचा चार्ट तयार झाल्यावरही तुम्ही तुमचे तिकीट कॅन्सल करू शकता. यावेळी etickets@irctc.co.in या ई-मेलवर सर्व माहिती पाठवल्यास तुम्हाला तुमचे रिफंड मिळू शकते. यासाठी तुम्हाला TDR (Ticket Deposit Receipt) भरावे लागते. तुमचे तिकीट वेटिंग मध्ये असेल आणि चार्ट तयार झाल्यावरही तिकीट कन्फर्म झाले नाही तर या तिकिटावरून तुम्हाला प्रवास करता येणार नाही. त्यावेळी तुमचा तिकीट रिफंड तुमच्या खात्यामध्ये जमा होतो. या महत्वाच्या बाबी लक्षात ठेवल्यास आणि आधीच पूर्वनियोजन केल्यास योग्य आरक्षित तिकीटासह आपला प्रवास आरामदायी आणि सुखकर होऊ शकतो.
त्यामुळे यंदा जर गणपतीच्या काळात कोकणात अथवा आपल्या गावी जायचा विचार करत असाल आणि त्यासाठी रेल्वेचे तिकिट आरक्षित करणार असाल तर वरील नियम पाळा, आणि खात्रीशीर आणि निवांत प्रवासाची हमी मिळवा.
