पुणेकरांसाठी एक महत्वाची आणि मोठी बातमी समोर येत आहे. कारण, पुणे शहराला पाणीपुरवठा करणाऱ्या खडकवासला धरण साखळीतील चारही प्रमुख धरणांमध्ये सध्या समाधानकारक पाणीसाठा जमा झाला. यामुळे वर्षभराचा पाणीप्रश्न मिटू शकतो. सकाळी सहा वाजेपर्यंत एकूण 13.16 टीएमसी (टक्केवारीने 45.13 %) पाणीसाठा नोंदवला गेला आहे. हा साठा गतवर्षीच्या तुलनेत तब्बल चारपट अधिक आहे. मागील वर्षी याच दिवशी फक्त 3.57 टीएमसी (12.24 %) पाणी साठले होते. गेल्या 24 तासांत चारही धरणांमध्ये एकूण 487 दशलक्ष घनफूट पाण्याची नव्याने भर पडली आहे. यामुळे पुणे शहराच्या पाणीपुरवठ्याची चिंता लक्षणीय प्रमाणात कमी झाली आहे. हा शहरवासियांसाठी मोठा दिलासा आहे.
खडकवासला धरणातून विसर्ग सुरू
खडकवासला धरणातून गेल्या आठ दिवसांपासून मुठा नदीत पाणी सोडले जात आहे. आतापर्यंत सुमारे 2.43 टीएमसी पाणी नदीत सोडण्यात आले असून, सध्या धरणाची पाण्याची पातळी सुमारे 1.20 टीएमसीवर स्थिर आहे. धरण क्षेत्रात होत असलेल्या पावसावर सतत लक्ष ठेवून नियोजनबद्ध विसर्ग सुरू ठेवण्यात येणार आहे.पावसामुळे धरणांमध्ये पाणीसाठ्यात वेगाने वाढ होत आहे. पावसाचा हा जोर असाच राहिला, तर पुणेकरांच्या पाण्याची चिंता मिटणार आहे. प्रशासनाने धरण क्षेत्रात होणाऱ्या पावसाची सतत निगराणी ठेवत आवश्यक त्या उपाययोजना सुरू केल्या आहेत. पुणेकरांसाठी सध्या दिलासादायक स्थिती असून, पावसाळ्याच्या सुरुवातीलाच धरण साखळीत समाधानकारक साठा जमल्याने शहराचा पाणीप्रश्न दूर झाला आहे.
पुणे शहराची पाण्याची चिंता मिटली!
पावसामुळे पुणे शहराची पाण्याची चिंता आता काहीशी निवळली आहे. मागील काही आठवड्यांपासून झालेल्या दमदार पावसामुळे खडकवासला, पानशेत, वरसगाव आणि टेमघर ही धरणं चांगल्या प्रमाणात भरली आहेत. त्यामुळे पाणी पुरवठ्याची टंचाई काही काळासाठी तरी टळली आहे. महापालिकेने नागरिकांना पाण्याचा वापर जपून करण्याचे आवाहन केले आहे, तरीही आगामी काही महिने पुणेकरांना निर्बंधाशिवाय नियमित पाणी पुरवठा होण्याची शक्यता आहे. शेतकऱ्यांनाही या पावसाचा फायदा होणार असून खरीप हंगामासाठी आवश्यकतेइतकं पाणी उपलब्ध होईल. हवामान खात्याच्या अंदाजानुसार आणखी काही दिवस चांगला पाऊस होण्याची शक्यता आहे. त्यामुळे नागरिकांमध्ये समाधानाचं वातावरण आहे. पावसामुळे निसर्गही खुलला असून वातावरण प्रसन्न झालं आहे.
