‘उदयपूर फाइल्स’ हा चित्रपट 11 जुलै रोजी प्रदर्शित होणार होता. मात्र, दिल्ली उच्च न्यायालयाने या चित्रपटाच्या प्रदर्शनावर तात्पुरती बंदी घातली आहे. हा चित्रपट उदयपूरमधील कन्हैया लाल यांच्या हत्येवर आधारित आहे. न्यायालयाने ही बंदी केंद्र सरकारकडून या चित्रपटावर कायमस्वरूपी बंदी घालण्यासंबंधी याचिकांवर निर्णय होईपर्यंत लागू ठेवली आहे.
दिल्ली उच्च न्यायालयाचे मत
दिल्ली उच्च न्यायालयाचे मुख्य न्यायमूर्ती डी.के. उपाध्याय आणि न्यायमूर्ती अनीश दयाल यांच्या खंडपीठाने याचिकादारांना निर्देश दिला की, त्यांनी दोन दिवसांच्या आत केंद्र सरकारकडे आपली तक्रार सादर करावी. हे याचिकादार कन्हैया लाल हत्या प्रकरणातील आरोपी आहेत. त्यांनी न्यायालयात दावा केला की, या चित्रपटामुळे त्यांच्या निष्पक्ष न्यायिक प्रक्रियेला (ट्रायल) बाधा येऊ शकते. न्यायालयाने सांगितले की, याचिकादारांनी अद्याप केंद्र सरकारकडे उपलब्ध असलेल्या उपायांचा वापर केलेला नाही, हे मान्य आहे.
केंद्र सरकारला दिले आदेश
दिल्ली उच्च न्यायालयाने म्हटले की, याचिकादारांना पुनरावलोकनाचा पर्याय वापरण्यास सांगितले जात असल्याने, केंद्र सरकारकडून तात्पुरत्या दिलासादायक अर्जावर निर्णय होईपर्यंत चित्रपटाच्या प्रदर्शनावर बंदी राहील. न्यायालयाने जमीयत उलेमा-ए-हिंद या संस्थेला दोन दिवसांच्या आत केंद्र सरकारकडे आपली याचिका सादर करण्यास सांगितले असून, केंद्र सरकारला त्या याचिकेवर सात दिवसांच्या आत निर्णय घेण्याचे निर्देश दिले आहेत.
२०२२ मध्ये एनआयएने केली होती चौकशी
जून 2022 मध्ये उदयपूरमधील एक टेलर कन्हैया लाल यांची हत्या करण्यात आली होती. या प्रकरणात मोहम्मद रियाज आणि मोहम्मद गौस यांना आरोपी करण्यात आले आहे. हत्येनंतर या आरोपींनी एक व्हिडिओ जारी करत, ही हत्या भाजपच्या माजी नेत्या नुपुर शर्मा यांच्या समर्थनार्थ सोशल मीडियावर पोस्ट शेअर केल्यामुळे केल्याचे सांगितले होते. या प्रकरणाची चौकशी राष्ट्रीय तपास संस्था (NIA) ने केली आणि आरोपींवर कडक UAPA कायदा आणि भारतीय दंड संहितेच्या विविध कलमांखाली गुन्हा दाखल करण्यात आला. सध्या हा खटला जयपूर येथील विशेष NIA न्यायालयात सुरू आहे.
