पोलेंडच्या इगा स्वियातेकने विम्बलडन 2025 महिला एकेरीचे विजेतेपद पटकावले आहे. 24 वर्षीय स्वियातेकने विम्बलडनचे विजेतेपद पहिल्यांदाच जिंकले आहे. हे तिच्या कारकिर्दीतील एकूण सहावे ग्रँड स्लॅम विजेतेपद आहे. तिने अंतिम फेरीत अमेरिकेच्या अमांडा एनिसिमोवा हिला सरळ सेटमध्ये 6-0, 6-0 अशा दमदार फरकाने पराभूत केले. अमांडाचा खेळ अत्यंत निराशाजनक ठरला, कारण ती एकही सेट जिंकू शकली नाही.
विम्बलडन जिंकणारी पहिली पोलिश महिला खेळाडू
टेनिस इतिहासात स्वियातेक ही विम्बलडनचे विजेतेपद जिंकणारी पहिली पोलिश महिला खेळाडू ठरली आहे. तिला राफेल नडालप्रमाणे क्ले कोर्टवरील उत्कृष्ट कामगिरीसाठी ओळखले जाते आणि तिने आतापर्यंत चार वेळा फ्रेंच ओपनचे विजेतेपद पटकावले आहे. मात्र आता तिने विम्बलडनच्या गवतावरील कोर्टवरही आपली ताकद सिद्ध केली आहे.
स्वियातेकने सुरुवातीपासूनच आक्रमक खेळ केला आणि फक्त 26 मिनिटांत पहिला सेट 6-0 ने जिंकून घेतला. तिच्यासमोर 23 वर्षीय अमेरिकन खेळाडू एकही क्षण टिकू शकली नाही. शेवटचा पॉइंट जिंकल्यानंतर स्वियातेक कोर्टवरच बसून आनंद साजरा करताना दिसली. महिला प्रोफेशनल टेनिसची सुरुवात 1926 मध्ये झाली होती आणि तब्बल 99 वर्षांनंतर, 2025 मध्ये, पोलेंडच्या कोणत्याही महिला खेळाडूने पहिल्यांदा विम्बलडनचे विजेतेपद पटकावले आहे.
इगाने आतापर्यंत खेळलेले सर्व 6 ग्रँड स्लॅम फायनल जिंकले
याशिवाय, इगा स्वियातेकने आतापर्यंत खेळलेले सर्व 6 ग्रँड स्लॅम अंतिम सामने जिंकले आहेत, म्हणजेच तिचा ग्रँड स्लॅम फायनल्समधील 100 टक्के विजयाचा विक्रम कायम आहे. याआधी ती विम्बलडनच्या महिला एकेरी स्पर्धेत क्वार्टरफायनलच्या पुढे जाऊ शकली नव्हती, पण यावेळी तिने थेट विजेतेपद जिंकून इतिहास घडवला आहे.
