Devendra Fadnavis : आज राज्य सरकारची राज्य मंत्रिमंडळाची बैठक अहिल्यानगर येथे होत आहे. पहिल्यांदाच मुंबईच्या बाहेर ही बैठक होत आहे. दरम्यान, पुण्यश्लोक अहिल्यादेवी होळकर सहकारी सूतगिरणी व मुख्यमंत्री ग्रामसडक योजनेंतर्गत चौंडी ते निमगाव डाकू रस्त्याचे भूमिपूजन मुख्यमंत्री देवेंद्र फडणवीस यांच्या हस्ते करण्यात आले. महायुती सरकार आल्यानंतर राज्यात अनेक पायाभूत सुविधांची कामे होताना दिसत आहेत. याचच एक भाग म्हणून आज मुख्यमंत्र्यांच्या हस्ते भूमिपूजन करण्यात आले.
यावेळी उपमुख्यमंत्री एकनाथ शिंदे, उपमुख्यमंत्री अजित पवार, विधानपरिषदेचे सभापती प्रा. राम शिंदे, महसूलमंत्री चंद्रशेखर बावनकुळे, जलसंपदा मंत्री व जिल्ह्याचे पालकमंत्री राधाकृष्ण विखे पाटील, सामाजिक न्याय मंत्री संजय शिरसाट, इतर मागास बहुजन कल्याण मंत्री अतुल सावे आदी मान्यवर उपस्थित होते.
३ कोटी ९४ लाख रुपयांच्या खर्चास मान्यता
दरम्यान, मुख्यमंत्री ग्रामसडक योजनेअंतर्गत चौंडी ते निमगाव डाकू दरम्यानचा २.७०० किलोमीटर लांबीचा रस्ता साकारण्यात येणार आहे. या कामासाठी राज्य शासनाने ३ कोटी ९४ लाख रुपयांच्या खर्चास मान्यता दिली आहे. हे काम महाराष्ट्र रस्ते विकास महामंडळाच्या माध्यमातून हाती घेण्यात येणार आहे. पाच वर्षांसाठी देखभाल व दुरुस्ती खर्चासाठी आवश्यक निधीची सुद्धा तरतूद करण्यात आली आहे. पुण्यश्लोक अहिल्यादेवी होळकर सूतगिरणी याच रस्त्यावर असल्याने ५.५० मीटर रुंद डांबरी रस्ता प्रस्तावित करण्यात आला आहे.
सूतगिरणीसाठी ९१ कोटी रुपयांचा निधी मंजूर
दुसरीकडे चौंडी शिवारात उभारण्यात येत असलेल्या या सूतगिरणीसाठी ९१ कोटी रुपये इतक्या निधीची तरतूद करण्यात आली असून कापूस उत्पादक शेतकऱ्यांना त्याचा थेट लाभ होणार आहे. तसेच सूतगिरणीमुळे परिसरात रोजगारनिर्मितीला चालना मिळणार असून, नवीन रस्त्यामुळे दळणवळण सुलभ होणार आहे. विशेष म्हणजे या सूतगिरणीमुळे विकासाला गती तसेच अर्थ व्यवस्थेला चालना मिळणार आहे. मुख्य म्हणजे कापूस उत्पादक शेतकऱ्यांना लाभ होणार असल्यामुळं शेतकऱ्यांनी समाधान व्यक्त केले आहे.
