मराठवाडा-विदर्भात पावसाने दमदार बॅटींग सुरू केली आहे. त्यामुळे सर्वदूर चांगल्या पावसाने हजेरी लावली आहे. नाशिक जिल्ह्यात गेल्या तीन दिवसांपासून सुरू असलेल्या मुसळधार पावसामुळे गोदावरी नदीला पूर आला असून, नदी दुथडी भरून वाहत आहे. या पावसामुळे जायकवाडी धरणाच्या पाणलोट क्षेत्रात मोठ्या प्रमाणावर पाणी येत आहे. मंगळवारी धरणात तब्बल 53,334 क्युसेकने पाण्याची आवक नोंदली गेली असून, धरणातील पाणीसाठा वाढून 60.71 टक्क्यांवर पोहोचला आहे.
जायकवाडीच्या पाणीसाठ्यात मोठी वाढ!
धरणाची पाणीपातळी सध्या 1,514 फूटांवर असून, एकूण साठा 2,056.083 दलघमी झाला आहे. त्यापैकी उपयुक्त म्हणजेच जिवंत साठा 1,317.977 दलघमी इतका आहे. 1 जून पासून आजपर्यंत जायकवाडीत सुमारे 22 टीएमसी पाण्याची आवक झाली आहे. विशेष म्हणजे गेल्या वर्षी याच दिवशी फक्त 4.06 टक्के पाणीसाठा शिल्लक होता, त्यामुळे यंदाच्या वर्षीची परिस्थिती समाधानकारक असल्याचे स्पष्ट होते.
मराठवाड्याचा पाणीप्रश्न वर्षभरासाठी मिटणार!
जायकवाडी धरण 2019, 2020, 2021, 2022 आणि 2024 या चार वर्षांत 100 टक्के भरले आहे. मात्र, 2023 मध्ये केवळ 47.23 टक्क्यांपर्यंतच पाणीसाठा झाला होता. यंदाही लवकरच धरण 100 टक्के भरण्याची शक्यता आहे. धरण भरल्यास छत्रपती संभाजीनगरसह मराठवाड्यातील पाच जिल्हे आणि अहिल्यानगर जिल्ह्याच्या काही भागांतील पिण्याच्या पाण्याचा, सिंचनाचा व औद्योगिक वापरासाठीच्या पाण्याचा प्रश्न वर्षभर सुटण्याची शक्यता आहे.
जायकवाडी धरण हे मराठवाड्यातील सर्वात मोठे जलस्रोत आहे आणि ते या भागासाठी जीवनरेषा मानले जाते. गोदावरी नदीवर बांधलेले हे धरण औरंगाबाद जिल्ह्यात स्थित आहे. मराठवाडा हा पर्जन्यछायेतील भाग असल्याने येथे पाण्याची टंचाई सतत भासत असते. जायकवाडी धरणातून सिंचनासाठी, पिण्याच्या पाण्यासाठी आणि औद्योगिक वापरासाठी मोठ्या प्रमाणावर पाणी पुरवठा होतो. विशेषतः औरंगाबाद, बीड, जालना या जिल्ह्यांना याचा फार मोठा लाभ होतो. धरणामुळे शेतीस चालना मिळते, रोजगारनिर्मिती होते आणि पिण्याच्या पाण्याचा प्रश्न सुटतो. त्यामुळे जायकवाडी धरणाचे मराठवाड्याच्या आर्थिक व सामाजिक विकासात अत्यंत महत्त्वाचे योगदान आहे.
