कल्याण ते अकोला मार्गावर धावणाऱ्या रेल्वेत अल्पवयीन मुलीवर लैंगिक अत्याचार झाल्याची धक्कादायक घटना उघडकीस आली आहे. या घटनेने एकच खळबळ उडाली आहे. या प्रकरणात कल्याण रेल्वे पोलिसांनी गुन्हा दाखल करत आरोपीच्या मुसक्या आवळल्या आहेत. तसेच पोलिसांकडून या प्रकरणाचा आणखी तपास सुरू आहे.
16 वर्षीय मुलीवर एक्स्प्रेसमध्ये अत्याचार
डोंबिवली परिसरात राहणारी 16 वर्षीय मुलीसोबत आरोपीने ओळख वाढवत गप्पा मारण्यास सुरुवात केली. हळूहळू गप्पा मारत मारत तिला विश्वासात घेण्यास सुरुवात केली. यानंतर एकेदिवशी आरोपीने तिला फूस लावून आपल्या गावी नेण्याचं ठरवलं. कल्याण रेल्वे स्थानकात तो तिला घेऊन आला. कल्याण रेल्वे स्थानकातून आरोपीने अकोल्याला जाणारी एक्सप्रेस पकडली.
आरोपीने या अल्पवयीन मुलीवर धावत्या ट्रेनमध्ये लैंगिक अत्याचार केले. अकोल्यात गेल्यावर आरोपी तिला आपल्या घरी घेऊन गेला. मात्र, त्याच्या कुटुंबियांनी त्याला घरात घेतले नाही. यानंतर आरोपी तिला पुन्हा अकोल्याहून कल्याणमध्ये घेऊन आला. कल्याण रेल्वे स्थानकात तिला सोडून तो निघून गेला. या घटनेमुळे भेदरलेल्या मुलीने कल्याण स्थानकात थांबण्याचा निर्णय घेतला. ती असहाय्य अवस्थेत दिसल्यानंतर पोलिसांनी चौकशी केल्यानंतर हा प्रकार उघडकीस आला.
