Mumbai Best : मुंबईची बेस्ट बसेस ही मुंबईकरांच्या दळवळणाचे मुख्य साधन मानले जाते. या बेस्ट बसेसबाबत मुंबईकरांसाठी एक महत्त्वाची बातमी समोर येत आहे. मुंबईकरांचा बेस्ट प्रवास आणखी सुखकर होणार आहे. बृहन्मुंबई इलेक्ट्रिक पुरवठा आणि परिवहन उपक्रम (बेस्ट) आणि गुगल यांच्यातील सहकार्यामुळे आता बेस्ट बसेसची रिअल-टाईम माहिती गुगल मॅपवर पाहता येणार आहे. त्यामुळं मुंबईकरांचा बेस्ट प्रवास आता अधिक सुलभ आणि स्मार्ट होणार आहे.
प्रवाश्यांच्या वेळेची बचत करुन त्यांच्या सुलभ प्रवाशांच्या दृष्टीने ही एक उपयुक्त सुविधा उपलब्ध होत असल्याचे मुख्यमंत्री देवेंद्र फडणवीस यांनी सांगितले. गुगल मॅपवर बसमार्गाची माहिती या प्रणालीचे उद्घाटन मुख्यमंत्री श्री.फडणवीस यांच्या हस्ते झाले. यावेळी उपमुख्यमंत्री एकनाथ शिंदे उपस्थित होते.
सुविधेच्या दिशेने एक महत्त्वपूर्ण पाऊल
दरम्यान, बेस्ट आणि गुगल मॅप यांच्यातील हे सहकार्य मुंबईतील सार्वजनिक वाहतुकीच्या गुणवत्तापूर्ण सुविधेच्या दिशेने एक महत्त्वपूर्ण पाऊल आहे. या सुविधेमुळे ‘बेस्ट’च्या ग्राहकांच्या संख्येतही वाढ होईल. प्रवाश्यांना या सुविधेचा पुरेपूर लाभ घेता यावा यासाठी प्रत्येक बसस्थानकावर या सुविधेबाबतची सविस्तर माहिती उपलब्ध करुन द्यावी,असे मुख्यमंत्री फडणवीस यांनी यावेळी सांगितले. प्रवाशांना इच्छित ठिकाणी जाण्यासाठी कोणत्या वेळी कोणती बस उपलब्ध होईल, ती बस मिळण्याची अचूक वेळ या गोष्टी सहजतेने आता उपलब्ध असणार आहेत, ज्यामुळे प्रवाश्यांच्या वेळेची बचत होईल आणि सोयीस्कर प्रवास करणे त्यांना शक्य होणार आहे.
प्रवास आणखी सुलभ होणार…
गुगल मॅपसोबतच्या सहकार्यामुळे मुंबईकरांना त्यांच्या प्रवासाची आखणी अधिक सोप्या आणि सोयीस्कर पद्धतीने करता येणार आहे.” या सहकार्यामुळे प्रवाशांना त्यांच्या मोबाईलवरच बस कुठे आहे, किती वेळात येईल, विलंब झाला आहे का, याची माहिती मिळणार आहे. असे ‘बेस्ट’चे महाव्यवस्थापक एस. व्ही. आर. श्रीनिवास म्हणाले. या प्रणालीमुळे मुंबईतील प्रवाशांना रिअल-टाईम सार्वजनिक वाहतूक माहिती देण्यास सक्षम झालो आहोत. वाहतुकीची अचूक आणि संपूर्ण माहिती देणे हे गुगल मॅप्सचे प्राधान्य आहे आणि हे सहकार्य त्या दिशेने एक महत्त्वाचे पाऊल असल्याचे गुगल मॅप्सच्या भारत प्रमुख रोलि अग्रवाल म्हणाल्या.
प्रवाशांनी रिअल-टाईम बस माहिती पाहण्यासाठी काय करावे?
- आपल्या Android किंवा iOS डिव्हाईसवर Google Maps अ‍ॅप उघडा.
- आपल्या प्रवासाचे गंतव्यस्थान टाका आणि ‘Go’ आयकॉनवर क्लिक करा.
- ट्रामच्या चिन्हावर टॅप करून ‘Public Transport’ मोड निवडा.
- सुचवलेली सेवा निवडून बसचे थांबे आणि रिअल-टाईम माहिती तपासा.
- एखाद्या बस स्टॉपसाठी सर्च करूनही रिअल-टाईम बस माहिती पाहता येईल.
