महायुती सरकारचा हिंदी सक्तीचा शासन निर्णय रद्द झाल्यानंतर मराठीचा विजयी मेळावा साजरा करण्यासाठी तब्बल 18 वर्षांनंतर ठाकरे बंधूंना एकत्र एका व्यासपीठावर पाहता येणार आहे. महाराष्ट्र नवनिर्माण सेना आणि शिवसेना ( उद्धव बाळासाहेब ठाकरे) या पक्षातील कार्यकर्त्यांमध्येही ठाकरे बंधु एकत्र येणार याची उत्सुकता आहे. शिवाय, राज्यभरातील मनसे कार्यकर्त्यांमध्ये देखील मोठा उत्साह सध्या पाहायला मिळत आहे. राज्यातील मराठी जनतेचे देखील आजच्या या मेळाव्याकडे विशेष लक्ष असणार आहे.
18 वर्षांनंतर ठाकरे बंधू एकत्र दिसणार
सरकारने हिंदी सक्तीचा निर्णय रद्द केल्यानंतर शिवसेना पक्षप्रमुख उद्धव ठाकरे आणि मनसे अध्यक्ष राज ठाकरे एकत्र विजयी मेळावा घेणार आहेत. हा विजयी मेळावा आज, 5 जुलै एन. एस. सी. आय. डोम वरळी इथं होणार आहे. या मेळाव्यापूर्वी दोन्ही पक्षांच्या कार्यकर्त्यांकडून जोरदार बॅनरबाजीदेखील झाली. हिंदी सक्तीचा निर्णय रद्द झाल्याने त्याविरोधात पुकारण्यात आलेला मोर्चा रद्द झाला. मोर्चा रद्द झाल्यानंतर विजयी मेळावा घेण्याचं उद्धव ठाकरे यांच्याकडून जाहीर करण्यात आलं.
शिवसेना (ठाकरे गट) नेते खासदार संजय राऊत यांनी राज ठाकरेंना फोन करून या मेळाव्यात सहभागी होण्याचं निमंत्रण दिलं होतं. याची माहिती स्वत: राज ठाकरेंनी पत्रकार परिषद घेऊन दिली होती. हा विजयी मेळावा असला तरी त्यात कोणतंही पक्षीय लेबल लावायचं नाही, हा मराठी माणसाचा विजय आहे, त्यामुळे मेळावा मराठी माणसाचा आहे, असं ते म्हणाले. त्यामुळे दोन्ही ठाकरे आज एकत्र दिसणार हे नक्की.
काँग्रेस पक्ष, शरद पवारांचा पाठिंबा?
महायुती सरकारने हिंदी सक्तीचा जीआर रद्द केल्यानंतर आज ठाकरे बंधू एकत्र येत आहेत. या मेळाव्याच्या पार्श्वभूमीवर लावलेले बॅनर्स विशेष चर्चेत आले आहेत. या मेळाव्याला शरद पवार आणि काँग्रेसच्या वतीनेही पाठिंबा असल्याचं बॅनर्सवरून दिसून येत आहे. ‘मराठीचा भव्य विजय मेळावा, आवाज महाराष्ट्राचा, आवाज मराठी माणसाचा, आवाज ठाकरेंचा,’ असा बॅनरवर मजकूर आहे. मुलुंड टोलनाक्यावर असे बॅनर्स लावण्यात आले आहेत.
वाजत गाजत या!
जल्लोष करत या!
आनंदाने या! हक्काने या!
हा लढा आपला सर्वांचा आहे,
हा विजयही आपला सर्वांचा आहे!@AUThackeray pic.twitter.com/vjOQf0brIm— ShivSena – शिवसेना Uddhav Balasaheb Thackeray (@ShivSenaUBT_) July 4, 2025
