मुंबई : वेव्हज २०२५ परिषद मुंबईत होते आहे. ही बाब महाराष्ट्रासाठी गौरवास्पद आहे. जागतिक स्तरावर मनोरंजन क्षेत्रातील गुंतवणुकीसाठी ही परिषद ‘दावोस’ ठरणार असल्याचे उपमुख्यत्री एकनाथ शिंदेंनी सांगितले. दरम्यान, मुंबई बीकेसी येथील जिओ वर्ल्ड सेंटर येथे १ ते ४ मे दरम्यान ‘वर्ल्ड ऑडिओ व्हिज्युअल एंटरटेन्मेंट समिट’चा (वेव्हज) कार्यक्रम आयोजित करण्यात आला आहे. या समिटच्या तयारीची पाहणी आज उपमुख्यमंत्री एकनाथ शिंदे यांनी केली. आज दुपारीउपमुख्यमंत्री शिंदे यांनी जिओ वर्ल्ड सेंटरला भेट दिली. यावेळी मुंबई महापालिका आयुक्त भूषण गगराणी, प्रधान सचिव नविन सोना, उपमुख्यमंत्र्यांचे अपर मुख्य सचिव असीम गुप्ता, उद्योग विभागाचे प्रधान सचिव अनबलगन, एमआयडीसीचे मुख्य कार्यकारी अधिकारी पी. वेलारसु आदी यावेळी उपस्थित होते.
परिषदेबाबत सादरीकरण…
दरम्यान, पुढे बोलताना उपमुख्यमंत्री शिंदे म्हणाले की, पंतप्रधान नरेंद्र मोदी यांच्या दुरदृष्टीतू‌न ही परिषद साकार होत आहे. विशेष म्हणजे प्रधानमंत्री नरेंद्र मोदी १ मे रोजी संपूर्ण दिवसभर मुंबईत उपस्थित राहणार आहेत. या कार्यक्रमाचे यजमानपद महाराष्ट्र शासनाला मिळाले ही अभिमानाची बाब असून, मुख्यमंत्री देवेंद्र फडणवीस यांच्या नेतृत्वाखाली हे आयोजन होत आहे. यावेळी परिषद कशा प्रकारे होणार आहे याबाबतचे सादरीकरण ही करण्यात आले.
मुंबई हे देशाचे ग्रोथ इंजिन…
जागतिक पातळीवर भारताचे नाव आग्रहाने घेतले जाते. दरम्यान, भारत जगात आघाडीवर आहे, हे सिद्ध करण्यासाठी ही परिषद महत्वाची असून मुंबई हे देशाचे ग्रोथ इंजिन आहे. तसेच मिडिया आणि मनोरंजनाचे हे केंद्र असल्याने या परिषदेमुळे मनोरंजन क्षेत्राला तांत्रिकदृष्ट्या नवी ओळख मिळणार असल्याचे उपमुख्यमंत्री एकनाथ शिंदेंनी सांगितले. या परिषदेमुळे आंतरराष्ट्रीय स्टुडिओज, प्रोडक्शन हाऊसेस, टेक कंपन्यांची भागीदारीची याची दारे खुली होतील असेही ते म्हणाले. दरम्यान, या ‘वेव्हज’ परिषदेला विविध क्षेत्रातील मान्यवर उपस्थित राहणार आहेत. बॉलिवूड, उद्योग, मनोरंजन, क्रीडा आदी क्षेत्रातील दिग्गज मंडळी उपस्थित राहणार असल्याचे बोलले जात आहे. ही ‘वेव्हज’ परिषद मुंबईत बीकेसीतील जिओ वर्ल्ड सेंटर येथे १ ते ४ मे दरम्यान पार पडणार आहे.
