Open pores home remedies: प्रत्येक व्यक्तीला नितळ आणि चमकदार त्वचा हवी असते. पण आजकाल वाढते प्रदूषण, खाण्यापिण्याच्या चुकीच्या सवयी, चुकीची जीवनशैली आणि रासायनिक उत्पादनांचा वापर यामुळे आपल्याला त्वचेशी संबंधित अनेक प्रकारच्या समस्यांना तोंड द्यावे लागत आहे. यापैकी एक म्हणजे ओपन पोर्स अर्थातच चेहऱ्यावरील उघड्या छिद्रांची समस्या होय. ओपन पोर्समुळे चेहऱ्यावर मोठे खड्डे पडू लागतात. ज्यामुळे चेहऱ्याच्या सौंदर्यावर परिणाम होतो. यामुळे त्वचा खडबडीत आणि असमान दिसू लागते.खासकरून हे नाक, गाल, कपाळ किंवा हनुवटीवर दिसतात. त्यामुळेच आज आपण ओपन पोर्स कशामुळे होतात आणि ते टाळण्यासाठी घरगुती उपाय काय करता येतील याबाबत जाणून घेणार आहोत.
कशामुळे होतात ओपन पोर्स?
आपल्या त्वचेवर लहान-लहान छिद्रे असतात ज्यातून घाम आणि तेल बाहेर पडते. यामुळे त्वचेला श्वास घेण्याची संधी मिळते. जेव्हा हे छिद्र मोठे होतात तेव्हा त्याला ओपन पोर्स म्हणतात. उघड्या छिद्रांची अनेक कारणे असू शकतात. जसे की तेलकट त्वचा, सेबमचे जास्त उत्पादन, हार्मोनल असंतुलन, अनुवंशिकता, वृद्धत्व, सूर्यप्रकाशामुळे होणारे नुकसान आणि त्वचेची योग्य काळजी न घेणे. या सर्व कारणांमुळे ओपन पोर्स दिसून येऊ शकतात.
१) अ‍ॅलोवेरा जेल-
अ‍ॅलोवेरा जेलमध्ये अँटीऑक्सिडंट आणि अँटी-बॅक्टेरियल गुणधर्म मोठ्या प्रमाणात असतात. जे त्वचा स्वच्छ आणि घट्ट करण्यास मदत करतात. ते त्वचेला मॉइश्चरायझ करते आणि ओपन पोर्सना घट्ट करतात. तुमच्या चेहऱ्यावर अ‍ॅलोवेरा जेल लावा आणि १०-१५ मिनिटे तसेच राहू द्या. त्यानंतर चेहरा ताज्या पाण्याने धुवून टाका.
२) टोमॅटोचा रस-
टोमॅटोचा रस ओपन पोर्स कमी करण्यासाठीदेखील खूप प्रभावी आहे. त्यात अ‍ॅस्ट्रिंजंट गुणधर्म असतात. जे त्वचा घट्ट आणि स्वच्छ करतात. यासाठी कापसाच्या मदतीने टोमॅटोचा रस चेहऱ्यावर लावा आणि सुमारे १५ मिनिटे तसेच राहू द्या. त्यानंतर चेहरा पाण्याने धुवा. काही दिवसांतच तुम्हाला फरक जाणवेल.
३) मुलतानी माती-
ओपन पोर्सची समस्या दूर करण्यासाठी तुम्ही मुलतानी माती वापरू शकता. यासाठी एक चमचा गुलाबजल आणि दोन चमचे मुलतानी माती मिसळून पेस्ट तयार करा. आता ही पेस्ट तुमच्या चेहऱ्यावर लावा आणि सुकू द्या. सुमारे १५ मिनिटांनी चेहरा स्वच्छ पाण्याने धुवा. त्वचेवरील घाण साफ करण्यासोबतच, मुलतानी माती ओपन पोर्स कमी करण्यास देखील मदत करते.
४) दही-
दह्यामध्ये लॅक्टिक अ‍ॅसिड भरपूर प्रमाणात असते. त्यामुळे ते त्वचेला एक्सफोलिएट करण्यास आणि आधीच असलेल्या मुरुमांवर उपचार करण्यास मदत करते. दुसरे म्हणजे, दह्यामध्ये अनेक अँटीबॅक्टेरियल गुणधर्म देखील असतात. जे तुमचे छिद्र मोकळे करतात आणि मुरुमांना कारणीभूत असलेल्या कोणत्याही प्रकारच्या बॅक्टेरियावर उपचार करतात. ते फेसपॅक म्हणून लावल्याने त्वचेला मॉइश्चरायझेशन मिळते आणि तिची लवचिकता वाढते. यासाठी नेहमी कमी फॅटचे दही वापरा.
(टीप : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल MP मराठी Breaking कोणताही दावा करीत नाही.)
