IPL 2025 Final : इंडियन प्रीमियर लीग फक्त क्रिकेट आणि ग्लॅमरचा खेळ नाही, तर ही एक कोट्यवधींच्या कमाईचं व्यासपीठही आहे. या टूर्नामेंटमधून संघांच्या फ्रँचायझीपासून ते BCCI पर्यंत प्रत्येकाला दरवर्षी कोट्यवधी रुपयांचा फायदा होतो. ही कमाई जाहिराती, ब्रॉडकास्टिंग आणि इतर स्रोतांद्वारे होते.
मात्र, या सगळ्यांमध्ये जिओ हॉटस्टारदेखील मागे नाही. प्रत्येक हंगामात ब्रॉडकास्टिंगच्या माध्यमातून हॉटस्टारला कोट्यवधी रुपयांची कमाई होते.
आता IPL 2025 अंतिम टप्प्यात पोहोचले आहे. 3 जून रोजी या हंगामाचा अंतिम सामना खेळला जाणार आहे, ज्यात रॉयल चॅलेंजर्स बेंगळुरू आणि पंजाब किंग्स आमनेसामने असतील. दोन्ही संघ आपली पहिली IPL ट्रॉफी जिंकण्यासाठी मैदानात उतरतील.
फायनल मॅचसह या हंगामाचा शेवट होईल. IPL चा हा हंगाम प्रेक्षकांच्या दृष्टीने खूपच यशस्वी ठरला आहे आणि याचा फायदा जिओ हॉटस्टारलाही झाला आहे. चला तर मग जाणून घेऊया की, IPL च्या प्रत्येक हंगामातून हॉटस्टारची किती कमाई होते?
नेटफ्लिक्सला मागे टाकण्याच्या मार्गावर
जर युजर्सच्या संख्येच्या दृष्टीने पाहिलं, तर IPL चा हा हंगाम हॉटस्टारसाठी एखाद्या लॉटरीसारखा ठरला आहे. जिओ आणि हॉटस्टारच्या विलीनीकरणानंतर या प्लॅटफॉर्मवरील युजर्सची संख्या झपाट्याने वाढली आहे आणि आता हे नेटफ्लिक्सलाही मागे टाकण्याच्या उंबरठ्यावर पोहोचले आहे. आकड्यांनुसार, जिओ हॉटस्टारचे सब्स्क्रिप्शन या महिन्यात 280 दशलक्षांवर पोहोचले आहे, जे एप्रिलमध्ये सुमारे 200 दशलक्ष होते. दुसरीकडे, नेटफ्लिक्सकडे सध्या जगभरात 300 दशलक्ष सब्स्क्रिप्शन आहेत. या तुलनेत जिओ हॉटस्टार फक्त 20 दशलक्षने मागे आहे.
प्रत्येक हंगामात होते भरघोस कमाई
IPL च्या प्रत्येक हंगामात फक्त ब्रॉडकास्टिंगच्या माध्यमातूनही हॉटस्टार कोट्यवधींची कमाई करते. आकडे पाहता, IPL चा हा हंगाम जिओ हॉटस्टारसाठी केवळ ग्राहकसंख्या वाढविण्याचाच नव्हे, तर महसूलाच्या दृष्टीनेही अत्यंत फायदेशीर ठरला आहे. एका अहवालानुसार, या हंगामातून जिओ हॉटस्टारला सुमारे 4500 कोटी रुपयांचा महसूल मिळण्याची अपेक्षा आहे. तुलनेत, मागील हंगामात हा आकडा सुमारे 4000 कोटी रुपये होता.
