ई-कॉमर्स कंपनी अ‍ॅमेझॉन इंडिया भारतात 2000 कोटी रुपयांहून अधिक गुंतवणूक करणार असल्याची घोषणा गुरुवारी केली. कंपनीने स्पष्ट केलं की, या गुंतवणुकीमागील उद्दिष्ट अखिल भारतीय ऑपरेशनल नेटवर्क अधिक मजबूत करणे हा आहे. PTIच्या वृत्तानुसार, अमेझॉनने म्हटलं आहे की या गुंतवणुकीमुळे नेटवर्कचा विस्तार आणि अपग्रेडेशन होईल, ज्यामुळे ग्राहकांना अधिक वेगवान आणि विश्वासार्ह सेवा देता येईल, तंत्रज्ञान आणि नवप्रवर्तनाला चालना मिळेल तसेच कर्मचाऱ्यांचे व भागीदारांचे जीवनमान सुधारता येईल.
भारतातील ई-कॉमर्सला मोठा आधार
ही गुंतवणूक जाहीर करण्याचा काळ महत्त्वाचा मानला जातो, कारण सध्या भारतातील ई-कॉमर्स बाजार वेगाने वाढतो आहे. ब्रॉडबँड कनेक्टिव्हिटी, स्वस्त स्मार्टफोन, डिजिटल पेमेंट्स, आर्थिकदृष्ट्या सक्षम मध्यमवर्गीय कुटुंबांचे वाढते खर्च आणि डिजिटल-प्रथम असलेली तरुण लोकसंख्या यामुळे हा बाजार विस्तारतो आहे. अ‍ॅमेझॉन आणि वॉलमार्टच्या Flipkartसारख्या कंपन्यांसह छोट्या ऑनलाइन प्लेअर्सनीही ई-कॉमर्स क्षेत्राला नवीन दिशा दिली आहे.
2030 पर्यंत $325 अब्ज डॉलर्सचा बाजार
अमेझॉनने भारतात गेल्या काही वर्षांत अब्जावधी डॉलर्सची गुंतवणूक केली आहे. काही अंदाजानुसार, भारतातील ई-कॉमर्स बाजार वर्षाकाठी 21% चक्रवाढ दराने वाढून 2030 पर्यंत 325 अब्ज अमेरिकी डॉलर्सपर्यंत पोहोचू शकतो. 2000 कोटी रुपयांहून अधिक गुंतवणुकीची ही घोषणा अमेझॉनच्या आधीच सुरू असलेल्या नेटवर्क गुंतवणुकीचा भाग आहे, ज्यामुळे कंपनी भारतातील प्रत्येक सेवायोग्य पिन कोडवर डिलिव्हरी करू शकते.
काय आहे अमेझॉनची योजना?
या नव्या गुंतवणुकीतून अमेझॉन भारतात नवीन साइट्स सुरू करणार असून सप्लाय, सॉर्टेशन आणि डिलिव्हरी नेटवर्कमधील विद्यमान सुविधा अपग्रेड करणार आहे. या अपग्रेडमुळे कंपनीची प्रोसेसिंग क्षमता वाढेल, पुरवठ्याचा वेग सुधारेल आणि ऑपरेशनल नेटवर्क अधिक सक्षम होईल. त्याचा थेट परिणाम म्हणजे ग्राहकांना अधिक विश्वासार्ह आणि जलद सेवा मिळेल.
Amazon च्या ऑपरेशन्स नेटवर्कमधील विद्यमान आणि नवीन दोन्ही इमारती तंत्रज्ञान आणि कार्यक्षम इमारत प्रणालींनी डिझाइन केल्या आहेत जेणेकरून ऊर्जेचा वापर कमी होईल. Amazon फुलफिलमेंट सेंटर्स देखील अपंग लोकांसाठी अधिक सुरक्षित आणि सुलभ होण्यासाठी डिझाइन केले आहेत, ज्यामध्ये कल्याण आणि सुरक्षितता सुनिश्चित करण्यासाठी आणि समावेशक कामाचे वातावरण प्रदान करण्यासाठी कूलिंग सोल्यूशन्स, सुरक्षा उपक्रम आणि विश्रांती क्षेत्रे सुधारण्यावर लक्ष केंद्रित केले आहे, असे कंपनीने म्हटले आहे.
