Chandrahar Patil : महाराष्ट्रातील आगामी स्थानिक निवडणुकांच्या पार्श्वभूमीवर राजकीय हालचालींना वेग आला आहे. या दरम्यान सांगली जिल्ह्यात उद्धव ठाकरे यांच्या शिवसेना (उबाठा) पक्षाला मोठा धक्का बसण्याची शक्यता आहे. शिवसेना उबाठाचे नेते आणि डबल महाराष्ट्र केसरी विजेते चंद्रहार पाटील ९ जून रोजी शिवसेना (शिंदे गट) मध्ये प्रवेश करणार असल्याची माहिती आहे. चंद्रहार पाटील शक्तिप्रदर्शन करून पक्षप्रवेश करणार आहेत.
काही दिवसांपूर्वी सांगलीच्या भालवणी येथे झालेल्या एका बैठकीत उद्योगमंत्री उदय सामंत यांच्या उपस्थितीत चंद्रहार पाटील यांनी त्यांना चांदीची गदा देऊन सन्मानित केले होते.
हा कार्यक्रम राजकीय दृष्टिकोनातून अत्यंत महत्त्वाचा मानला जात आहे. या वेळी शिवसेना मंत्री उदय सामंत यांनी गंमतीत म्हटले, “चंद्रहार पाटील यांनी आम्हाला हार घातला, पण आम्ही त्यांना कधी घालणार, हे एकनाथ शिंदे साहेब ठरवतील. आणि पाटलांच्या गळ्यात तो हार कधी पडेल, याचा निर्णयही तेच घेतील.”
चंद्रहार पाटील एकनाथ शिंदेच्या संपर्कात
या वक्तव्यानंतर चंद्रहार पाटील यांच्या संभाव्य पक्षप्रवेशाच्या चर्चांना आणखी बळ मिळाले आहे. विशेष म्हणजे, चंद्रहार पाटील हे यापूर्वी लोकसभा निवडणुकीत उद्धव ठाकरे गटाकडून उमेदवार होते. मात्र, मागील काही काळापासून ते एकनाथ शिंदे यांच्या संपर्कात असल्याचे सांगितले जात आहे.
ते याआधीही उद्योगमंत्री उदय सामंत यांच्यासह रत्नागिरीत उपमुख्यमंत्री आणि शिवसेना पक्षप्रमुख एकनाथ शिंदे यांची भेट घेतली होती आणि दोघांनी एकत्र जेवणही केले होते. याशिवाय, चंद्रहार पाटील आणि खासदार श्रीकांत शिंदे यांच्या काही फोटोंनीही सोशल मीडियावर जोरदार चर्चा केली होती, आणि श्रीकांत शिंदे यांनी सार्वजनिकरित्या त्यांची प्रशंसा केली होती.
या सगळ्यामुळे हे स्पष्ट संकेत मिळाले होते, की चंद्रहार पाटील शिंदे गटाच्या संपर्कात आहेत. आता पुन्हा एकदा ते उदय सामंत यांच्यासोबत व्यासपीठावर झळकले आणि त्यांनी त्यांचा सत्कारही केला, त्यामुळे ही शक्यता अधिक बळकट झाली आहे की कुस्तीपटू चंद्रहार पाटील लवकरच शिवसेना (शिंदे गट) मध्ये प्रवेश करतील.
चंद्रहार पाटील यांच्यामुळे उबाठाचा काँग्रेसशी संघर्ष
लोकसभा निवडणुकीत महाविकास आघाडी असूनही सांगलीच्या जागेवर युबीटी आणि काँग्रेस आमनेसामने आले. काँग्रेसचे विशाल पाटील आणि युबीटीचे चंद्रहार पाटील यांनी निवडणूक लढवली.
काँग्रेसने या जागेची मागणी केली होती, परंतु संजय राऊत या जागेवर ठाम होते, त्यामुळे महाविकास आघाडीतही फूट पडली. पण आता ज्या चंद्रहार पाटलांसाठी संजय राऊत यांनी इतका संघर्ष केला होता, तोच शिवसेनेत जाणार आहे.
