बचत गटामुळे महिलांना स्वावलंबन मिळाल्याचं अनेक प्रकरणांमधून दिसतं. राज्यभरातील महिलांना बचत गटाच्या निमित्ताने आपल्या कौशल्याच्या आधारावर कमाई करता येत आहे. या बचत गटाच्या महिला आता मुंबईत प्रवासी रिक्षा चालवताना दिसणार आहे. धुणं-भांडी करण्यापेक्षा रिक्षा चालवणं चांगलं असल्याचं अनेक महिलांना वाटतं. त्यामुळे बचत गटाच्या महिला स्वयंपाकाबरोबरच रिक्षा चालवतानाही दिसणार आहेत. मुंबई महानगरपालिका आणि केंद्र सरकारच्या पुढाकारातून हा उपक्रम राबवला जात आहे. विशेष म्हणजे यापैकी एका रिक्षा चालक महिलेने मिसेस मुख्यमंत्री अमृता फडणवीस आणि आमदार मंगेश कुडाळकर यांना आपल्या रिक्षात बसवून कार्यक्रमस्थळी आणलं.
केंद्र सरकार पुरस्कृत दीनदयाल अंत्योदय योजना अंतर्गत स्थापन नारी शहर समूह-राष्ट्रीय नागरी उपजीविका अभियान आणि टीव्हीएस यांच्या संयुक्त विद्यमाने एकूण 50 महिलांना स्वयंरोजगारासाठी प्रवासी रिक्षांचं वाटप करण्यात आलं आहे. बृहन्मुंबई महानगरपालिकेकडून यासाठी महिलांना रिक्षा चालविण्याचे प्रशिक्षण आणि सर्व प्रकारचे परवाने मोफत देण्यात आले.
मुंबई महानगरपालिकेकडून महिलांना रिक्षा चालवण्याचं प्रशिक्षण
बृहन्मुंबई महानगरपालिका, केंद्र सरकार पुरस्कृत दीनदयाल अंत्योदय योजना अंतर्गत स्थापन नारी शहर समूह-राष्ट्रीय नागरी उपजीविका अभियान आणि टीव्हीएस यांच्या संयुक्त विद्यमाने एकूण 50 महिलांना स्वयंरोजगारासाठी प्रवासी रिक्षा वाटप करण्यात आल्या. आमदार मंगेश कुडाळकर, दिव्याज फाऊंडेशनच्या अध्यक्षा अमृता फडणवीस, बृहन्मुंबई महानगरपालिकेच्या संचालक (नियोजन) डॉ. प्राची जांभेकर आदींसह महिला बचत गटाच्या सदस्यांच्या उपस्थितीत या रिक्षांचे वाटप करण्यात आले. बृहन्मुंबई महानगरपालिकेकडून यासाठी महिलांना रिक्षा चालविण्याचे प्रशिक्षण आणि सर्व प्रकारचे परवाने मोफत देण्यात आले.
कुर्लातील नेहरू नगर भागातील मुंबई पब्लिक स्कूलमध्ये 8 एप्रिल 2025 रोजी सायंकाळी हा कार्यक्रम पार पडला. परिसरातील छत्रपती शिवाजी महाराज मैदान येथे मान्यवरांच्या उपस्थितीत 50 रिक्षांना हिरवा झेंडा दाखविण्यात आला. ‘वुमेन्स ऑन व्हिल’ या महत्वाकांक्षी उपक्रमाअंतर्गत या रिक्षांचे वितरण करण्यात आले. या कार्यक्रमाला टिव्हीएसचे अधिकारी निशांत दास, अभ्युदय बँकेच्या सहाय्यक महाव्यवस्थापक प्रिती सावंत आदींसह बचत गटाच्या महिला उपस्थित होत्या.
महिला सशक्तीकरणासाठी आणखी एक पाऊल
मुंबईतील होतकरू महिलांचे आर्थिक सशक्तीकरणासाठी मुंबई महानगरपालिका महिलांना वेगवेगळं व्यासपीठ उपलब्ध करून देत असते. त्यामुळे बचत गटांना विविध माध्यमातून रोजगार उपलब्ध होतो. त्याचाच एक भाग म्हणून आता महिलांना बँकांकडून कमी व्याजदरावर या रिक्षा उपलब्ध करून देण्यात आल्या आहेत. या रिक्षांतून महिला प्रवाशी वाहतूक करण्यासाठी सज्ज झाल्या आहेत. त्यासाठी महिलांना वाहन चालविण्याचे प्रशिक्षण, आवश्यक परवाने, रिक्षा नोंदणी बिल्ला इत्यादी सर्व सुविधा पूर्णपणे मोफत उपलब्ध करून देण्यात आल्या आहेत. या 50 महिलांपैकी बहुतांश महिला या भांडूप आणि कुर्ला परिसरातील रहिवासी आहेत.
