मुंबई : नाट्य रसिकांसाठी एक आनंदाची बातमी समोर येत आहे. येत्या २५ ते २७ एप्रिल २०२५ या कालावधीत सायंकाळी ६.०० ते १०.०० या वेळेत रवींद्र नाट्य मंदिर, प्रभादेवी, मुंबई या ठिकाणी भारतरत्न पंडित भीमसेन जोशी शास्त्रीय संगीत महोत्सवाचे आयोजन करण्यात येणार आहे. सांस्कृतिक कार्य संचालनालयाच्या वतीने विविध महोत्सवाचे आयोजन करण्यात येते. दरम्यान, या महोत्सवाची संकल्पना सांस्कृतिककार्य मंत्री आशिष शेलार यांची आहे, मुख्यमंत्र्यांचे अपर मुख्य सचिव तथा सांस्कृतिक कार्य विभागाचे अपर मुख्य सचिव विकास खारगे यांच्या मार्गदर्शनाखाली या महोत्सवाचे आयोजन करण्यात येणार आहे.
कसा असणार महोत्सव…
दरम्यान, या महोत्सवात शुक्रवार दिनांक २५ एप्रिल, २०२५ रोजी पहिल्या पुष्पात सायंकाळी ६.०० वाजता विदुषी अश्विनी भिडे-देशपांडे यांचे शास्त्रीय गायनाचा कार्यक्रम सादर होणार आहे. तर याच दिवशी पं. उस्ताद शाहिद परवेझ यांचाही शास्त्रीय गायनाचा सांस्कृतिक कार्यकम सादर होणार आहे. शनिवार दिनांक २६ एप्रिल, २०२५ रोजी दुसऱ्या पुष्पात सायंकाळी ६.०० वाजता डॉ. भरत बलवल्ली तसेच विदुषी मंजुषा पाटील यांचा शास्त्रीय गायनाचा कार्यकम सादर होईल. रविवार दिनांक २७ एप्रिल, २०२५ रोजी सायंकाळी ६.०० वाजता ज्येष्ठ गायक पंडित आनंद भाटे यांचे गायन आणि ज्येष्ठ शास्त्रीय गायक पं. उल्हास कशाळकर यांचे शास्त्रीय गायनाचा कार्यक्रम सादर होणार आहे.
महोत्सव रसिक प्रेक्षकांसाठी विनामुल्य…
दुसरीकडे हा महोत्सव म्हणजे रसिकांसाठी पर्वणी आहे. रसिकांसाठी ही गायनाची मेजवानी असल्याचे बोलले जात आहे. दरम्यान, उपरोक्त शास्त्रीय संगीत महोत्सव रसिक प्रेक्षकांसाठी विनामुल्य ठेवण्यात आलेला आहे. विनामुल्य प्रवेशिका रवींद्र नाट्य मंदिर-प्रभादेवी, छत्रपती शिवाजी नाट्यमंदिर – दादर आणि यशवंत नाट्य मंदिर – माटुंगा येथे उपलब्ध असणार आहे, अशी माहिती मंत्री आशिष शेलार यांनी दिली आहे.
