बांगलादेशमध्ये निवडणुका जाहीर झाल्या, शेख हसीना भारतात राहूनही निवडणूक लढवू शकतील का? नियम जाणून घ्या

Bangladesh Elections : बांगलादेशमध्ये सार्वत्रिक निवडणुकांची घोषणा अखेर झाली आहे. मोहम्मद युनुस यांच्या नेतृत्वाखालील अंतरिम सरकारने शुक्रवारी जाहीर केलं की बांगलादेशमध्ये सार्वत्रिक निवडणुका एप्रिल 2026 च्या पहिल्या आठवड्यात होतील. निवडणुकांच्या मुद्द्यावरून अंतरिम सरकार आणि लष्करप्रमुख यांच्यात तणाव निर्माण झाला होता. त्यावेळी लष्करप्रमुखांनी लवकर निवडणुका जाहीर करण्याचा इशारा दिला होता. आता प्रश्न उपस्थित होतो की, शेख हसीना भारतात राहून बांगलादेशातील निवडणूक लढवू शकतात का?

युनुस सरकारने निवडणुकीची घोषणा केली

गेल्या वर्षी ऑगस्टमध्ये माजी पंतप्रधान शेख हसीना यांना पदावरून हटवण्यात आल्यानंतर अंतरिम सरकारचा कार्यभार मोहम्मद युनुस यांनी घेतला होता. त्यावेळी त्यांनी मतदानासाठी किमान वय 17 वर्षांपर्यंत खाली आणण्याचा प्रस्ताव दिला होता. तसेच, निवडणुका 2025 च्या शेवटच्या काळात किंवा 2026 च्या पहिल्या सहामाहीत घेता येतील, असं सांगितलं होतं. मात्र, अखेर युनुस सरकारने एप्रिल महिन्यात निवडणुका घेण्याची घोषणा केली आहे. आता शेख हसीना यांच्या पक्षाबद्दलही समजून घेऊया.

शेख हसीना निवडणुका लढवू शकतात का?

बांगलादेशात सत्तांतरानंतर माजी पंतप्रधान शेख हसीना भारतात आल्या. आता प्रश्न असा आहे की, त्या भारतात राहून निवडणुका लढवू शकतात का? त्याचं उत्तर “नाही” आहे, कारण बांगलादेशच्या अंतरिम सरकारने शेख हसीना यांच्या अवामी लीग पक्षावर अधिकृतपणे बंदी घातली आहे. त्यामुळे शेख हसीना यांचं निवडणूक लढवण्याचं स्वप्न आता भंगलेलं आहे. मागच्या महिन्यातच निवडणूक आयोगाने घोषित केलं होतं की त्यांनी अवामी लीगचा नोंदणी क्रमांक रद्द केला आहे. त्यामुळे आता हा पक्ष निवडणुका लढवू शकणार नाही.

कोणत्या कायद्याखाली पक्षावर बंदी?

बांगलादेश सरकारने नव्याने सुधारित केलेल्या दहशतवादविरोधी कायद्याच्या अंतर्गत शेख हसीना यांचा अवामी लीग पक्ष अधिकृतरित्या बरखास्त केला आहे. यासंदर्भात अधिकृत राजपत्र अधिसूचना (गजट नोटिफिकेशन) देखील जारी करण्यात आलेली आहे.