Nirmala Gavit Joins Shiv Sena : उद्धव ठाकरे यांच्या शिवसेनेला (उबाठा) मोठा धक्का बसला आहे. बुधवारी (२८ मे) माजी आमदार निर्मला गावित यांनी एकनाथ शिंदे यांच्या शिवसेनेत प्रवेश केला. गावित यांच्यासोबत नाशिकमधील एक हजाराहून अधिक महिला कार्यकर्त्यांनीही शिवसेनेत प्रवेश केला. यावेळी उपमुख्यमंत्री एकनाथ शिंदे उपस्थित होते.
यावेळी गावित म्हणाल्या की, “आपले नेते बदलले आहेत, पण शिवसेना पक्ष तोच आहे.” त्याच वेळी, शिवसेना प्रमुख एकनाथ शिंदे म्हणाले की, नवीन सदस्यांचे आगमन महायुती सरकारच्या कामगिरीचे प्रतिबिंब आहे. ते म्हणाले की, हे सरकार काम करत आहे आणि त्यांना लोकांची सेवा करायची आहे हे लक्षात घेऊन या कार्यकर्त्यांनी शिवसेनेत सामील होण्याचा निर्णय घेतला आहे.
महापालिका निवडणुकांची तयारी सुरू करा- एकनाथ शिंदे
एकनाथ शिंदे यांनी पक्ष कार्यकर्त्यांना राज्यातील आगामी महानगरपालिका निवडणुकांच्या तयारीस सुरुवात करण्याचे आवाहन केले आहे. येत्या काळात मुंबईसह महाराष्ट्रातील प्रमुख शहरांमध्ये स्थानिक स्वराज्य संस्थांच्या निवडणुका होणार आहेत. या निवडणुकांच्या पार्श्वभूमीवर सर्वच पक्षांनी तयारी सुरू केली आहे. विधानसभेच्या निवडणुकीनंतर होणाऱ्या या निवडणुकांमध्ये कोण बाजी मारणार हे पाहणे औत्सुक्याचे ठरेल.
विधानसभा निवडणुकीत महायुतीने मोठा विजय मिळवला होता आणि महाविकास आघाडीला मोठा धक्का बसला होता. महाविकास आघाडीत काँग्रेस, शरद पवार यांची राष्ट्रवादी काँग्रेस (शरद पवार), आणि उद्धव ठाकरे यांची शिवसेना (उबाठा) यांचा समावेश आहे. तर महायुतीत भाजप, एकनाथ शिंदे यांची शिवसेना आणि अजित पवार यांची राष्ट्रवादी काँग्रेस यांचा समावेश आहे
काँग्रेसमधून राजकारणाला सुरुवात
इगतपुरी येथील माजी आमदार राहिलेल्या निर्मला गावित यांनी काँग्रेसमधून राजकीय कारकिर्दीची सुरुवात केली होती. त्या माजी केंद्रीय मंत्री दिवंगत माणिकराव गावित यांच्या कन्या आहेत. त्या दोनदा आमदार होत्या.
२०१९ मध्ये त्या काँग्रेस सोडून शिवसेनेत सामील झाल्या. त्या म्हणाल्या की, मी २०१९ मध्ये एकनाथ शिंदे यांच्या मार्गदर्शनाखाली शिवसेनेत सामील झाले होते. आता नेतृत्व बदलले आहे. लोकांच्या अपेक्षा पूर्ण करण्यासाठी मी शिवसेनेत सामील होत आहे.
