Shivsena – ठाकरेंच्या शिवसेनेला लागलेली गळती काही थांबण्याचे नाव घेत नाही. माजी आमदार, पदाधिकारी, नेते आणि कार्यकर्ते हे ठाकरे गटाकडून शिंदेंच्या सेनेत गेल्या काही दिवसांपासून जाताहेत. दरम्यान, शिवसेनेचे मुख्य नेते व राज्याचे उपमुख्यमंत्री एकनाथ शिंदे यांच्या कार्याने प्रभावित होऊन मुंबईतील उबाठा गटाच्या तीन माजी नगरसेवकांनी एकनाथ शिंदेंच्या उपस्थितीत शिवसेनेत जाहीर प्रवेश केला आहे. त्यामुळं पुन्हा एकदा शिंदे गटाने ठाकरे गटाला धक्का दिला आहे.
वर्धापन दिनाच्या धरतीवर उबाठाला धक्का…
दरम्यान, याशिवाय ठाणे तसेच गोवा राज्यातील उबाठाच्या पदाधिकाऱ्यांनी शिवसेनेचा धनुष्यबाण हाती घेतला. या पक्ष प्रवेशाने शिवसेना वर्धापन दिनीच मुंबईत उबाठाला मोठा धक्का बसला आहे. उबाठाचे विभागप्रमुख आणि माजी नगरसेवक अजित भंडारी, शाखाप्रमुख संजय जंगम, प्रभाग क्रमांक १६१ चे उबाठा गटाचे माजी नगसेवक विजेंद्र शिंदे, प्रभाग क्रमांक १४० च्या राष्ट्रवादी काँग्रेस शरद पवार गटाच्या नगरसेविका नादिया शेख आणि शिवसेना युवा सेना सचिव मोहसीन शेख यांनी उपमुख्यमंत्री शिंदे यांच्या उपस्थितीत शिवसेनेत प्रवेश केला.
विकासकामांना निधी कमी पडू देणार नाही…
जे शिवसेनेत सामील झालेल्या लोकप्रतिनिधींच्या विश्वासाला तडा जाऊ देणार नाही. त्यांच्या प्रभागांतील विकास कामांना निधी कमी पडू देणार नाही, अशी ग्वाही यावेळी उपमुख्यमंत्री एकनाथ शिंदे यांनी दिली. तसेच गोवा राज्यातील उबाठा गटाचे माजी राज्य प्रमुख उपेंद्र गावकर, काँग्रेस महासचिव काशिनाथ मयेकर, पाच तालुकाप्रमुख, एक शहर प्रमुख, विभागप्रमुख आणि कार्यकर्त्यांनी आज शिवसेनेचा धनुष्यबाण हाती घेतला. ठाण्यातील रामचंद्रनगर शाखेचे उबाठाचे उपविभागप्रमुख मोहन चव्हाण, विजय काते, विजय पवार, महादेव कदम, प्रवीण बामणे आणि अनेक उपशाखाप्रमुख, गटप्रमुख यांनी शिंदेंच्या शिवसेनेत प्रवेश केला.
