मुंबई – मुंबईतील रेल्वे लोकल ही मुंबईकरांची जीवनवाहिनी समजली जाते. दररोज लाखो मुंबईकर या रेल्वे लोकलमधून प्रवास करतात. जर लोकल वेळवर आली नाही किंवा रद्द झाली तर लोकलवर तुडूंब गर्दी झाल्याचे चित्र दिसते. मुंबईकरांच्या प्रवासाचे मुख्य साधन म्हणून रेल्वे लोकलकडे पाहिले जाते. दरम्यान, याच मुबईच्या रेल्वे लोकलबाबत एक महत्वाची व मोठी बातमी समोर येत आहे. रविवारी (दिनांक २०.०४.२०२५) रोजी मध्य आणि हार्बर रेल्वे मार्गावर विविध अभियांत्रिकी आणि देखभालीची कामे करण्यासाठी मेगा ब्लॉक घेण्यात येणार आहे. त्यामुळं मुंबईकरांनो रविवारी रेल्वेचे वेळापत्रक वाचूनच घराबाहेर पडा, अन्यथा तुम्ही अडकून पडण्याची शक्यता आहे.
मध्य रेल्वेवर मेगा ब्लॉक कुठे?
दरम्यान, रविवारी छत्रपती शिवाजी महाराज टर्मिनस (सीएसएमटी) आणि विद्याविहार दरम्यान अप आणि डाऊन धीम्या मार्गावर सकाळी १०:५५ ते दुपारी १५.५५ मेगा ब्लॉक घेण्यात येणार आहे. सीएसएमटी येथून सकाळी १०.४८ ते दुपारी १५.४५ पर्यंत सुटणाऱ्या डाऊन धीम्या मार्गावरील लोकल सेवा छत्रपती शिवाजी महाराज टर्मिनस मुंबई आणि विद्याविहार स्थानकादरम्यान डाऊन जलद मार्गावर वळवल्या जाणार आहे. तसेच भायखळा, परळ, दादर, माटुंगा, शीव आणि कुर्ला स्थानकांवर थांबतील आणि विद्याविहार स्थानकावर डाऊन धीम्या मार्गावर पुन्हा वळविल्या जातील. ब्लॉकच्या कालावधीत मस्जिद, सँडहर्स्ट रोड, चिंचपोकळी आणि करी रोड या स्थानकांवर उपनगरीय रेल्वे सेवा उपलब्ध राहणार आहेत. तसेच घाटकोपर येथून सकाळी १०.१९ ते दुपारी १५.५२ पर्यंत सुटणाऱ्या अप धीम्या गाड्या विद्याविहार आणि छत्रपती शिवाजी महाराज टर्मिनस मुंबई स्थानकांदरम्यान अप जलद मार्गावर वळवल्या जातील. आणि कुर्ला, शीव, माटुंगा, दादर, परळ आणि भायखळा स्थानकांवर थांबतील. ब्लॉक दरम्यान करी रोड, चिंचपोकळी, सँडहर्स्ट रोड आणि मशीद या स्थानकांवर उपनगरीय रेल्वे सेवा उपलब्ध राहणार नाहीत.
डाऊन धीम्या मार्गावर…
ब्लॉकपूर्वीची शेवटची लोकल छत्रपती शिवाजी महाराज टर्मिनस लोकल आहे. जी छत्रपती शिवाजी महाराज टर्मिनस मुंबई येथून १०.०७ वाजता सुटेल. ब्लॉकनंतर पहिली लोकल छत्रपती शिवाजी महाराज टर्मिनस लोकल आहे. जी छत्रपती शिवाजी महाराज टर्मिनस मुंबई येथून १५.५७ वाजता सुटेल.
अप धीम्या मार्गावर..
छत्रपती शिवाजी महाराज टर्मिनस मुंबईसाठी ब्लॉकपूर्वीची शेवटची लोकल कल्याण येथून ०९.१३ वाजता सुटेल. छत्रपती शिवाजी महाराज टर्मिनस मुंबईसाठी ब्लॉकनंतर पहिली लोकल कल्याण येथून १५.१० वाजता सुटेल.
हार्बर रेल्वेवर मेगा ब्लॉक कुठे?
ठाणे आणि वाशी, नेरुळ दरम्यान अप आणि डाऊन ट्रान्स हार्बर मार्गावर सकाळी ११.१० ते संध्याकाळी १६.१० (०५.०० तासांचा) मेगा ब्लॉक घेण्यात येणार आहे. ठाण्याहून वाशी, नेरुळ, पनवेल येथे जाणाऱ्या डाऊन हार्बर मार्गावरील सेवा सकाळी १०.३५ ते संध्याकाळी १६.०७ पर्यंत रद्द राहतील. दरम्यान, पनवेल, नेरुळ, वाशी ते ठाणे अप हार्बर मार्गावरील सेवा १०.२५ वाजता वाशी ते नेरुळ १६.०९ वाजता रद्द करण्यात येतील. हा मेगा ब्लॉक्स पायाभूत सुविधांच्या देखभाल आणि सुरक्षिततेसाठी घेण्यात येत आहे. दरम्यान, ब्लॉकच्या कालावधीत प्रवाशांना होणाऱ्या गैरसोयीबद्दल रेल्वे प्रशासनाला सहकार्य करावे, अशी विनंती रेल्वे प्रशासनाकडून करण्यात आली आहे.
