पुणे: भारतात सध्या उष्णतेचा कहर पाहायला मिळत आहे. काही राज्यांत, उन्हाचा कहर दिसत असतानाच दुसरीकडे काही भागांत मुसळधार पाऊस, वादळी वारे आणि बर्फवृष्टीमुळे लोकं हैराण झाले आहेत. देशासह महाराष्ट्रात 22 एप्रिल ते 25 असेच हवामान राहण्याचा अंदाज हवामान विभागाने वर्तवला आहे.
दक्षिण भारत, महाराष्ट्राला उष्णतेच्या लाटेचा इशारा
रविवारी महाराष्ट्रातील चंद्रपूर जिल्हा देशातील सर्वात उष्ण शहर होतं, तिथे तापमान 44.6 अंश सेल्सिअसपर्यंत पोहोचले. विदर्भ, तेलंगणा, गुजरात, तामिळनाडू आणि कर्नाटकातील अनेक भागात उष्ण वाऱ्यांमुळे लोकं अक्षरश: भाजून निघत आहेत. हवामान खात्याने या भागात उष्णतेच्या लाटेचा इशारा जारी केला आहे. आगामी तीन दिवसांत महाराष्ट्र, राजस्थान, गुजरात, तेलंगणा, कर्नाटक या राज्यांत उष्ण हवामान असेच राहण्याची शक्यता आहे.
उष्णतेचा तडाखा वाढल्याने तडाखा बसत असून उष्माघातामुळे काही ठिकाणी लोकांचा बळीही गेल्याचे वृत्त आहे. मात्र याच भारतात सध्या परस्परविरोधी तापमान दिसत आहे. काही राज्यांत, उन्हाचा कहर दिसत असतानाच दुसरीकडे काही भागांत मुसळधार पाऊस, वादळी वारे आणि बर्फवृष्टीमुळे लोकं हैराण झाले आहेत.
अवकाळी पावसाची शक्यता
भारतीय हवामान खात्याच्या सांगण्यानुसार, पुढील काही दिवस देशातील 23 हून अधिक राज्यांमध्ये वादळी वारे आणि पावसाची मालिका सुरूच राहील. जम्मू-काश्मीर आणि लडाखमध्ये ताशी 60 किमी वेगाने वारे वाहण्याची शक्यता आहे, तर ईशान्य भारतात वादळासह मुसळधार पाऊस पडण्याची शक्यता आहे. महाराष्ट्राला तूर्तास अवकाळी पावसाचा कोणताही इशारा नाही.
उत्तर भारतातील जम्मू-काश्मीर आणि लडाखमध्ये हवामानाने भयानक रूप धारण केले आहे. काही ठिकाणी ढगफुटीमुळे चिनाब नदीला पूर आला, ज्यामुळे अनेक घरे आणि रस्ते उद्ध्वस्त झाले. भूस्खलनामुळे अनेक रस्ते बंद आहेत आणि शाळा बंद ठेवण्यात आल्या आहेत. तर लडाखमध्ये अनपेक्षित बर्फवृष्टीमुळे परिस्थिती आणखी बिकट झाली आहे, वीज आणि वाहतूक व्यवस्था विस्कळीत झाल्याने लोकांचे हाल होत आहेत.
परंतु एकीकडे उष्णता आणि एकीकडे अवकाळी पाऊस या परस्पर विरोधी हवामानामुळे देशातील नागरिकांची मोठी तारांबळ होण्याची शक्यता आहे.
