रायगड : गृहमंत्री अमित शाह हे दोन दिवसांच्या महाराष्ट्र दौऱ्यावर आज रात्री येत आहेत. त्यांचा मुक्काम आज पुण्यात असणार आहे. छत्रपती शिवाजी महाराजांच्या पुण्यतिधी निमित्त ते उद्या (शनिवारी) सकाळी रायगडला जातील. रायगड किल्यावर ते शिवाजी महाराजांना अभिवादन करणार आहेत. यावेळी मुख्यमंत्री देवेंद्र फडणवीस, उपमुख्यमंत्री अजित पवार, उपमुख्यमंत्री एकनाथ शिंदे देखील उपस्थित असणार आहे.
अमित शाह शनिवारी पहाटे पुण्याहून रायगडच्या दिशेने रवाना होती. रायगडच्या पायथ्याशी असलेल्या पाचड या गावी ते राजमाता जिजाऊ यांच्या समाधीचे दर्शन घेतील. त्यानंतर ते किल्ले रायगडावर पुढील कार्यक्रमासाठी जातील.
सुनील तटकरेंच्या घरी स्नेहभोजन
राष्ट्रवादी काँग्रेसचे प्रदेशाध्यक्ष सुनील तटकरे यांनी अमित शाह यांना स्नेहभोजनाचे निमंत्रण दिले आहे. त्यामुळे शहा हे तटकरेंच्या रोह्यातील घरी स्नेहभोजनासाठी जाणार आहेत. या स्नेहभोजनासाठी मुख्यमंत्री देवेंद्र फडणवीस, उपमुख्यमंत्री अजित पवार तसेच प्रफुल्ल पटेल देखील उपस्थित राहणार आहेत.
मुंबईत कार्यक्रम
अमित शाह हे रायगडवरून मुंबईकडे रवाना होणार आहेत. तेथे ते एका कार्यक्रमाला तेथे उपस्थित राहणार आहेत. त्यानंतर सह्याद्री अतिथीगृहावर ते मुख्यमंत्री देवेंद्र फडणवीस तसेच दोनही उपमुख्यमंत्री अजित पवार, एकनाथ शिंदे यांच्याशी संवाद साधणार आहेत.
पालकमंत्रिपदाचा तिढा सुटणार?
रायगड आणि नाशिकच्या पालकमंत्रिपदाचा तिढा कायम आहे. शिवसेना भरत गोगावलेंसाठी रायगडच्या पालकमंत्रिपदासाठी आग्रही आहे. तर, राष्ट्रवादी काँग्रेसला ते देखील हे पद हवे आहे. रायगडच्या पालकमंत्रिपदी आदिती तटकरे यांची नियुक्ती करण्यात आली होती. मात्र, शिंदेंच्य नाराजीनाट्यानंतर नियुक्तीला स्थगिती देण्यात आली. त्यामुळे सुनील तटकरे डिनर डिप्लोमसीच्या माध्यमातून अमित शाहांच्या उपस्थित हा प्रश्न सोडवण्याचा प्रयत्न करणार असल्याची चर्चा आहे.
