Devendra Fadnavis : सध्या हिंदी सक्ती भाषेवरुन मोठे वांदग निर्माण झाले आहे. पहिलीपासून त्रिभाषा सूत्र राबवण्यावरुन आणि हिंदी भाषेच्या छुप्या सक्तीवरुन मनसेसह मराठी अभ्यासक, तज्ज्ञ आणि जाणकार राज्यात चांगलेच आक्रमक झाले आहेत. मनसेनं यात आक्रमक पवित्रा घेत शाळांमध्ये हिंदी भाषा शिकवताच कशी हे बघू, असा इशारा देण्यात आलाय. हिंदीच्या विरोधात मनसेनं सोमवारी स्वाक्षरी मोहीम राबवली आहे. हिंदी सक्ती भाषेवरुन वाद सुरु असताना आता त्रिभाषा सूत्रासंदर्भात मुख्यमंत्री देवेंद्र फडणवीस यांच्या वर्षा निवासस्थानी सोमवारी रात्री उशिरा एक बैठक पार पडली.
…त्यानंतरच अंतिम निर्णय
दरम्यान, त्रिभाषा सूत्रासंदर्भात साहित्यिक, भाषा तज्ञ, राजकीय नेते आणि इतरही सर्व संबंधितांशी चर्चा करुनच अंतिम निर्णय घेण्यात येईल, असे प्रतिपादन मुख्यमंत्री देवेंद्र फडणवीस यांनी केले. या बैठकीला उपमुख्यमंत्री एकनाथ शिंदे, शालेय शिक्षण मंत्री दादा भुसे, राज्यमंत्री डॉ.पंकज भोयर आणि शिक्षण विभागातील अधिकारी यावेळी उपस्थित होते. या विषयावर सांगोपांग चर्चा झाल्यानंतर सर्व राज्यांची स्थिती सर्वांसमोर मांडावी, नवीन शैक्षणिक धोरणांतर्गत मराठी मुलांचे ॲकडेमिक बँक ऑफ क्रेडिटच्या अनुषंगाने नुकसान होऊ नये, यासह इतरही पर्यायांवर सर्वांसाठी समग्र सादरीकरण करण्याचा निर्णय या बैठकीत घेण्यात आला.
जाणकारांची मते जाणून घेणार…
दुसरीकडे मराठी भाषेचे अभ्यासक, साहित्यिक, राजकीय नेते यासह सर्व संबंधितांसमोर याचे सादरीकरण आणि सल्लामसलतीची प्रक्रिया राबविण्यात यावी, असे या बैठकीत ठरले. ही सल्लामसलतीची प्रक्रिया पूर्ण झाल्यावरच अंतिम निर्णय घेण्यात येईल, असेही यावेळी मुख्यमंत्री देवेंद्र फडणवीस यांनी सांगितले. त्यामुळे शालेय शिक्षणमंत्री दादा भुसे हे आता पुढची सल्लामसलतीची प्रक्रिया प्रारंभ करणार आहेत. या बैठकीला मुख्यमंत्र्यांचे सचिव श्रीकर परदेशी, उपमुख्यमंत्र्यांचे अपर मुख्य सचिव असीमकुमार गुप्ता, उपमुख्यमंत्र्यांचे प्रधान सचिव नवीन सोना, शालेय शिक्षण विभागाचे प्रधान सचिव रणजितसिंग देओल आदी उपस्थित होते.
